Nisma e AAK marrin pjesë në Kuvend, votojnë kundër demarkacionit

31 Gusht 2016 - 14:21      

Dy kryetarët e partive opozitare, Fatmir Limaj i Nisma për Kosovën dhe Ramush Haradinaj i AAK-së, në një konferencë të përbashkët për media, kanë thënë se nesër do të marrin pjesë në seancën e Kuvendit të Kosovës ku do të vihet në votim marrëveshja për ratifikim të demarkacionit me Malin e Zi.

Por, sipas tyre, vota e të gjithë deputetëve të të dyja partive do të jetë kundër.

“Sot do t’i bëjmë të qarta qëndrimet tona. Qëndrimi nga dita e parë ka qenë kundër. Fatkeqësisht koalicioni qeverisës nuk e ka shfrytëzuar kohën që të ndërtohet një konsensus për t’i pranuar faktet dhe mendimet e ekspertëve”, ka thënë Limaj, raporton Koha.net.

“Të gjithë deputetët të kalojnë shabllonet partiake dhe bindjet partiake që të jenë në përputhje me betimin e tyre, nëpërmes votës ta unifikojmë Kosovën. Kjo është ftesa jonë. Të votohet kundër”, ka shtuar Limaj.

Ndërkaq, kreu i AAK-së, Haradinaj, tha se numri i deputetëve me votë kundër demarkacionit është rritur.

“Shpirtrat e shitur e të prishtë, Mustafa e Thaçi, këta hajna, mos të guxojnë ta shesin Kosovën e Rugovën. Kjo nuk është për agjenda politike, por për tokë të Kosovës. Këta shpirtra të prishtë nuk guxojnë të shiten e nuk munden t’u fshihen pas ndërkombëtarëve”, tha Haradinaj.

Ndërkaq, Limaj tha se nuk do të marrin pjesë në protestën e Vetëvendosjes, pasi që, siç u shpreh ai, “neve na takon të jemi në parlament e jo në protesta, nuk është e jona”.

Haradinaj tha se Qeveria ka kohë deri nesër ta tërheq vendimin për ta vënë në votim çështjen e demarkacionit.

“Ne nuk mundemi ta mashtrojmë askënd. Ne kemi qenë të gatshëm dhe jemi të punojmë me deputetë. I përkulemi deputetëve që janë tërhequr nga ai mendim i partisë. Kush voton pro, mos të harrojë se po voton me nda Rugovën për gjysmë”, deklaroi Haradinaj.  

© KOHA. Të gjitha të drejtat janë të rezervuara.