Qeveria e Kosovës ndan 50 mijë euro për të prekurit nga vërshimet në Maqedoni

31 Gusht 2016 - 10:33      

Qeveria e Kosovës në mbledhjen e mbajtur sot, ka marrë vendim për ndarjen e mjeteve financiare në vlerë prej 50 mijë euro për qytetarët e Republikës së Maqedonisë, të cilët janë goditur nga vërshimet me datë 6 dhe 7 gusht.

Ministri i Punëve të Jashtme, Enver Hoxhaj tha se Republika e Maqedonisë është goditur nga vërshime të mëdha, ku janë goditur edhe pjesë të lokaliteteve të banuara me shqiptarë, raporton KP.

“Në shenjë solidarizimi dhe në frymën e fqinjësisë së mirë, Kosova duhet ta ndjek shembullin e mirë në rajon dhe të ndajë mjete prej 50 mijë euro”, tha ai.

Qeveria po ashtu ka marrë vendim për ndarjen e 80 mijë euro për shlyerjen e obligimeve për vitin 2015 dhe 2016 për kryerjen e obligimit financiar të Qeverisë së Kosovës në këshillin për bashkëpunim rajonal me seli në Sarajevë.

Qeveria po ashtu ka miratuar dhe projektligjin për akreditim.