Në Merdare përurohet përmendorja për 1666 të pagjetur [video]

30 Gusht 2016 - 19:32      

Me aktivitete të shumta e me zotime institucionale, është shënuar Dita Ndërkombëtare për Personat e Zhdukur. Në Merdare është përuruar përmendorja për 1666 persona, që ende rezultojnë të pagjetur. Familjaret kërkojnë më shumë punë në zbardhjen e fatit të familjarëve të tyre.

Janë thënë mjaft fjalë të mëdha, por familjarët janë ngopur me fjalë dhe krejt çfarë duan është gjetja e më të dashurve të tyre. Siç transmeton KTV, kryetari i Komisionit qeveritar për personat e pagjetur, Prenk Gjeta, ka thënë se duhet t’i tregohet botës se edhe Kosova është pjesë e fatkeqësisë, derisa deputetë të Kuvendit kanë thënë se do të angazhohen vazhdimisht për të zbardhur fatin e të pagjeturve.

Në kujtim të të pagjeturve, presidenti i vendit, Thaçi, ka vendosur kurora lulesh te përmendorja dedikuar personave të zhdukur, në Prishtinë, duke dhënë zotimin e tij se do të punojë më tepër për zbardhjen e fatit të të pagjeturve.

Kryeministri Mustafa ka shprehur gatishmërinë e qeverisë për të punuar sa më shumë në zbardhjen e fatit të të pagjeturve, duke kërkuar nga bashkësia ndërkombëtare të bëjë presion mbi Beogradin për këtë çështje. Edhe misioni evropian për sundimin e ligjit në Kosovë, EULEX, ka deklaruar se do të vazhdojë punën për gjetjen e personave të zhdukur.

© KOHA. Të gjitha të drejtat janë të rezervuara.