Presidenti e quan terrorist sulmin në objektin e Kuvendit

30 Gusht 2016 - 17:56      

Presidenti i Kosovës, Hashim Thaçi, e ka cilësuar si terrorist sulmin kundër Kuvendit të Kosovës kohë më parë duke shtuar se “kjo formë e veprimit politik është e papranueshme dhe e patolerueshme”.

Reagimi i tij vjen pas arrestimit të disa aktivistëve të Vetëvendosjes si të dyshuar për këtë sulm.

Ai ka ftuar partitë politike për bashkëpunim si dhe ka ofruar mbështetjen e tij për organet e rendit.

Ky është reagimi i plotë i Thaçit:

Sulmi kundër institucionit më të lartë politik në vend, Kuvendit të Republikës së Kosovës, ishte një sulm terrorist dhe kjo formë e veprimit politik është e papranueshme dhe e patolerueshme.

Dhuna politike nuk do të ketë vend në shoqërinë dhe Kosovën tonë të re, të cilën me shumë sakrificë e kemi ndërtuar.

I mbështes organet e rendit që të jenë të pakompromis në ndjekjen e të gjithë atyre që cenojnë në çfarëdo forme shtetin e Kosovës.

Për punën e tyre ato meritojnë mirënjohje nga të gjithë ne.

Edhe qytetarët e Kosovës meritojnë vlerësim të lartë për pjekurinë e treguar, sepse ata vazhdimisht kanë kundërshtuar dhunën si formë të veprimit politik.

Gjithashtu, ftoj të gjitha subjektet politike që të mos bëhen pjesë e retorikës së dhunës dhe t’i lënë interesat e ngushta politike, por të bashkohen për të mirën e përgjithshme të Republikës së Kosovës.

© KOHA. Të gjitha të drejtat janë të rezervuara.