Qehaja: Vrasjet e fundit, befasuese – kemi pasur trend të rënies vit pas viti

29 Gusht 2016 - 23:38      

Në Prishtinë, tek Parku i Qytetit, sot mbetën të vdekur dy të rinj si pasojë e një përleshjeje të armatosur. Dorasi, sipas Policisë së Kosovës, është një shtetas i Shqipërisë, e që dyshohet të ketë qenë shok i viktimave, por mes tyre kishte pasur një mosmarrëveshje para aktit tragjik.

Por, në vetëm 10 ditët e fundit, në Kosovë kanë humbur jetën 9 persona nga armët e zjarrit e që motivet kanë qenë personale.

Për këtë çështje, në Interaktiv ka folur Florian Qehaja, njohës i çështjeve të sigurisë nga QKSS, i cili thotë se është e befasueshme kjo që ka ndodhur ditëve të fundit, pasi që vit pas viti, që nga paslufta, ka pasur rënie të vrasjeve në Kosovë.

“Në vitin 2000, në Kosovë janë vrarë mbi 350 vetë, kurse në vitin 2014-2015 ka rënë në 30. Në këtë drejtim ka pasur lëvizje pozitive, dmth nuk ka pasur vrasje. Kjo që ndodhi ditëve të fundit është befasi, motivet shihet se kanë qenë personale, pra për hakmarrje. Duhet të studiohet kjo që po ndodh që fundmi. Është ngritur niveli i pasigurisë tek qytetarët në Kosovë”, ka thënë Qehaja në Interaktiv të KTV-së, transmeton Koha.net.

Institucionet përgjegjëse duhet të ndërmarrin masa parandaluese, tha më tej Qehaja.

Sipas tij, armët në duart e qytetarëve në Kosovë janë pjesë e së kaluarës. Por thotë se është proces i pamundur çështja e çarmatimit.

Qehaja thotë se vrasjet e fundit, 9 sosh në 10 ditët e fundit, kanë motive të përbashkëta, por rastet nuk janë të ndërlidhura mes vete.  

© KOHA. Të gjitha të drejtat janë të rezervuara.