#Protestoj inauguron burgun “Dyz VIP” [video]

29 Gusht 2016 - 19:23      

Burgu “Dyz VIP” është inauguruar në mënyrë të improvizuar para ndërtesës së Qeverisë, në një aksion simbolik të një grupi qytetarësh.

Përmes këtij aksioni, aktivistë të “Protestoj” kanë kërkuar përgjegjësi institucionale, për krimin dhe korrupsionin, që sipas tyre, është shpërfaqur në aferën e përgjimeve, raporton KTV.

Aktivistët paralajmëruan se pas këtij aksioni, të martën sërish do të organizojnë protestën e radhës.

Ndërkaq, ka vazhduar publikimi i bisedave të përgjuara të ish-shefit të Grupit Parlamentar të PDK-së, Adem Grabovci, përmes të cilave dëshmohet për presionin dhe kërcënimet që kishin deputetët kundër Ligjit për Prizrenin dhe Hoçën e Madhe.

Adem Grabovci kishte përdorur “autoritetin frikësues” të një të paraburgosuri Naser Shalës për ta kërcënuar Jakup Krasniqin, që të mos dilte kundër projekteve të PDK-së.

Grabovci: “Jakupit, veç shkova i thash n’vesh, thash qy thash e thirri, e thirri ‘Ftyrën’ vallahin, ta kanë lokën”
“Edhe u dorëzu”.
Shala : “A t’ngoj bile”.
Grabovci : “Ngoji, meniherë, meniherë u tërhoq, derisa t’përmena ty”.

Grabovci kishte komunikuar edhe me kolegë të tjerë deputetë lidhur me zhvillimet politike, një me Latif Gashin, ish-deputet i PDK-së dhe Myzejene Selmanin, ish-shefe e Grupit Parlamentar të AKR-së.

Në bisedën e Grabovcit me Gashin, fyhen rëndë Ismet Beqiri e Visar Ymeri.

Gashi: “Eu nanën bota jau qift, po ‘qena’. A e beson se ma mirë po kalon Petriti me Rada Trajkoviqin, n’RTK, kqyre”
Grabovci: “Po, kordinohen ma mirë a ”

Gashi: “Definitivisht, po kanë mirëkuptim ma shumë, sesa Ismet Beqiri edhe Visari me juve… A qena, t’mdhaj bre, qysh…, mirë ke, mirë ke, nuk ke keq”.

Në bisedën tjetër me Myzejene Selmanin, Grabovci mundohej t’i bënte presion ish-deputetit të AKR-së, Emin Gërbeshi, që të votonte pro Ligjit për Prizrenin dhe Hoçën e Madhe.

Por, Selmani ankohej se Gërbeshi nuk i bindej asaj. Bile, as kryetarit të AKR-së, Behgjet Pacolli. 

© KOHA. Të gjitha të drejtat janë të rezervuara.