Më 1 shtator demarkacioni para deputetëve, seanca shtyhet për një orë e gjysmë

29 Gusht 2016 - 15:04      

Seanca plenare e Kuvendit të Kosovës, e thirrur për të enjten, më 1 shtator, ka në rend të ditës edhe pikën “Shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi”.

Fillimi i seancës do të shtyhet për një orë e gjysmë, nga ç’ishte planifikuar më herët, por arsye është mungesa e kryeparlamentarit, Kadri Veseli, transmeton Koha.net.

Arsyeja e shtyrjes është pjesëmarrja e përfaqësuesve të Kuvendit të Kosovës në ceremoninë e ndërrimit të Komandës së KFOR-it, - thuhet në njoftimin e sotshëm të Kuvendit. Me pajtimin e anëtarëve të Kryesisë së Kuvendit të Kosovës seanca plenare e 1 shtatorit shtyhet për një orë e gjysmë.

Seanca e paraparë të mbahej në orën 10:00, do të fillojë në orën 11:30.

Sipas thirrjes, në këtë seancë do të jetë ky rend i ditës:

1. Koha për deklarime jashtë rendit të ditës,

2. Koha për pyetje parlamentare,

3. Miratimi i procesverbalit nga seanca e mëparshme,

4. Interpelanca e Kryeministrit, Isa Mustafa, sipas kërkesës së deputetit Visar Ymeri, i mbështetur edhe nga 7 deputetë nënshkrues, në lidhje me kodin telefonik shtetëror të Republikës së Kosovës,

5. Interpelanca e Kryeministrit Isa Mustafa, sipas kërkesës së deputetit Ismajl Kurteshi, i mbështetur edhe nga 10 deputetë nënshkrues, në lidhje me situatën aktuale politike në pjesën veriore të Republikës së Kosovës,

6. Shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi,

7. Shqyrtimi i raportit vjetor të Autoritetit Rregullator të Komunikimeve Elektronike dhe Postare për vitin 2015,

8. Propozimi i GP të AAK-së për zëvendësimin e anëtarëve në komisionet parlamentare. 

© KOHA. Të gjitha të drejtat janë të rezervuara.