Kronikë e KTV-së për vrasjen e mbrëmshme në Deçan [video]

26 Gusht 2016 - 19:14      

Policia i ka arrestuar dorasit e vrasjes në Deçan, raporton KTV.

Babë e bir dyshohet se kanë vrarë Rexhep e Durim Ramajn, që të dy viktima të një incidenti tjetër ndërmjet vrasësve dhe Dervish Lushajt, i cili gjithashtu është arrestuar për armëmbajtje pa leje.

Një mosmarrëveshje ndërmjet familjes Lushaj në Deçan u ka kushtuar me jetë dy pjesëtarëve të familjes Ramaj, fqinjë të tyre.

Rexhep e Durim Ramaj kanë mbetur të vrarë të enjten pasdite nga Sali e Durim Lushaj, derisa këta të fundit kishin mosmarrëveshje me një kushëri të tyre, Dervish Lushaj.

Ky e kishte iniciuar një rast për dëmtim prone për të afërmin e tij Sali Lushajn, derisa viktimat janë përfshirë aksidentalisht në rast.

Familja Ramaj, viktimë e incidentit të Lushajve, ka hapur të pamën të premten në Shaptej të Deçanit.

Të tronditur, prapa kamerës, kanë thënë se nuk mund të flasin për rastin, por kanë konfirmuar se viktimat Rexhep e Burim Ramaj kanë dashur të intervenojnë në kacafytjen e familjes Lushaj, por pastaj kanë pësuar vetë.

Viktimat janë sjellë në Deçan pasdite, pas ekzaminimit të mjekësisë ligjore.

Vrasja e këtu në Deçan e ka quar në 6 numrin e të vrarëve nga armët e zjarrit vetëm brenda një jave në Kosovë.

3 mijë e 180 armë pa leje ka konfiskuar Policia e Kosovës nga viti 2015 e deri në korrik të këtij viti.

© KOHA. Të gjitha të drejtat janë të rezervuara.