Qeveria shiti me ankand bono thesari me vlerë 20 milionë euro

26 Gusht 2016 - 10:37      

Qeveria e Republikës së Kosovës ka mbajtur Ankandin KV014-16, ku u ofertuan Obligacione Qeveritare 5-vjeçare në vlerë nominale prej 20 milionë euro, me qëllim përkrahjen buxhetore.

Në këtë ankand tregu shfaqi kërkesë për blerje në vlerë 41.89 milionë euro, kurse ne pranuam vetëm shumën e shpallur paraprakisht, e që është 20 milionë euro, thuhet në komunikatën e Ministrisë së Financave të Kosovës, transmeton Koha.net. Norma vjetore e interesit për këtë ankand ishte 1.46%, gjë që paraqet një dallim relativisht të lartë prej -2.05 pikësh përqindje krahasuar me normën e interesit të ankandit të fundit të Obligacioneve 5-vjeçare, e cila ishte 3.51%.

Sipas rregullores, kuponi për këtë emetim do të jetë 1.40%, kurse pjesa tjetër prej 0.06% do të aplikohet si zbritje, ku si rezultat nesër realizojmë të hyra buxhetore në llogari shumën 19,945,962.15 euro.

Blerësit sipas kategorive janë :
Bankat: 19.83 milionë euro,
Fondet Pensionale: 0.11 milion euro

© KOHA. Të gjitha të drejtat janë të rezervuara.