Raporti i KTV-së për protestat kundër “Prontos” [video]

25 Gusht 2016 - 19:21      

Me thirrjet për dorëheqje dhe hetim penal për protagonistët e përgjimeve ‘Pronto’, ka nisur protesta e 6-të me radhë e organizuar nga shoqëria civile, raporton KTV.

Me pjesëmarrje më të madhe të protestuesve, kësaj radhe marshi i nisur nga sheshi ‘Zahir Pajaziti’ përfundoi te Qeveria e Kosovës.

Aty u kërkua që të shkarkohen të gjitha bordet dhe përzgjedhja e tyre të bëhet nën mbikëqyrjen e shoqërisë civile. Në shenjë zhgënjimi me përgjimet dhe personat e përfshirë në to, aeroplanë në formë letre u hodhën në drejtim të qeverisë së Kosovës.

E për t’u siguruar se gjithçka po shkonte mirë, u përkujdes Policia e Kosovës, e cila gjendej si jashtë ashtu edhe brenda rrethojave të qeverisë.

Ndërsa në përgjimet e radhës, të publikuara nga Insajderi, deputeti i PDK-së Hajdar Beqa, gjatë bisedës me Adem Grabovcin, konsultohet për avancimin e një personi të quajtur Hajzer nga pozita e sekretarit në anëtar të bordit të “Ibër Lepencit”.

Në bisedën e dytë, i ashtuquajturi shefi i shefave intervenon për punësimin e Shemsi Fetahut, kushëririt të deputetit të PDK-së, Naim Fetahut, i cili një kohë ka qenë drejtor i Administratës Tatimore të Kosovës. Ndërsa, pas kryerjes së intervistës me shkrim dhe me gojë, Afrim Dautaj kërkohet të takohet me Grabovcin.

© KOHA. Të gjitha të drejtat janë të rezervuara.