Më 30 gusht seanca për “Vettingun”

23 Gusht 2016 - 21:55      

Konferenca e Kryetarëve u mblodh pasditen e së martës, pas miratimin parimisht në Komision me votat e maxhorancës të ligjit të “Vettingut” dhe vendosi që seanca parlamentare të mbahet më datë 30 gusht.

Deputeti socialist Taulant Balla, pas mbarimit të mbledhjes se Konferencës së Kryetarëve, ku ishte e pranishme edhe opozita, konfirmoi se ndërkombëtarët do të kenë një rol thelbësor në procesin e “Vettingut”, që pritet të nisë në muajin shtator.

“Me 30 gusht në 17:00 Kuvendi do mblidhet në seancë të jashtëzakonshme për të shqyrtuar ligjin e parë të paketës së reformës në drejtësi. Iu la detyrë Komisionit të Posaçëm që të vazhdojë me dy ligjet e tjera. ShBA-BE, do të jenë pjesë esenciale e “Vettingut” që do të nisë në Shqipëri”, tha Balla.

Votimi në seancën plenare i hap rrugën nisjes së procesit të “Vettingut”, ndërsa sa u takon pretendimeve të opozitës së ligji shkel Kushtetutën e vendit, Balla tha se atë e vlerëson Gjykata Kushtetuese, jo Partia Demokratike.