VV: RTK është bërë altoparlant i Qeverisë, por kjo nuk justifikon bombat

23 Gusht 2016 - 12:55      

Lëvizja Vetëvendosje ka reaguar ndaj sulmit me grandë dore në objektin e RTK-së, duke thënë se menaxhmenti i televizionit publik të hënën mbrëma e konfirmoi se RTK-ja është shndërruar në propagandues të Qeveris.

“Lëvizja VETËVENDOSJE! ka shumë kohë që i bënë thirrje RTK-së të mos i shërbejë Thaçit, Veselit dhe Mustafës si altoparlant agjitacioni. Kapja e RTK-së është dëshmuar përmes uzurpimit të pozitave drejtuese nga militantët partiakë; është dëshmuar nga përgjimet dhe po dëshmohet vazhdimisht nga politikat redaktoriale të këtij mediumi”, thuhet në reagimin e Vetëvendosjes.

“Qeveria dhe klani Pronto nuk gjeti fajtorët për asnjërin prej sulmeve që kanë ndodhur kohët e fundit. RTK-ja në vend që të kërkojë përgjegjësi nga kjo qeveri dhe klani pronto, për dështimin e sistemit të sigurisë në vend dhe për mosgjetjen e fajtorëve, e sulmoi Lëvizjen VETËVENDOSJE! Lëvizja nuk pajtohet me sulmin e mbrëmshëm ndaj RTK-së, jo sepse RTK-ja e sotme simbolizon fjalën e lirë, por sepse nuk mendojmë që sulmet e tilla me bomba ndihmojnë ndonjë kauzë të drejtë në Kosovë. Çlirimi i shtetit tonë nga klani pronto që ka uzurpuar çdo institucion publik, do të ndodh vetëm përmes protestave masive paqësore nëpër sheshet e Prishtinës”.

© KOHA. Të gjitha të drejtat janë të rezervuara.