Ndërron jetë arkitekti pejan, Qemajl Beqiri

22 Gusht 2016 - 20:29      

Në moshën 82 vjeçare, ka ndërruar jetë njëri nga arkitektët e parë në qytetin e Pejës, Qemajl Beqiri.

Ai për disa muaj me radhë është përballur me një sëmundje, të cilës nuk ka arritur t’i mbijetoi.

Beqiri lindi më 11 shkurt të vitit 1934, në Pejë. Studimet e arkitekturës i kishte përfunduar në vitin 1962 në Beograd, në klasën e Prof Mate Bajlon, për të vazhduar studimet, në vitin 1975-1977, në shkallën e tretë – drejtimi Urbanizëm.

Punën e tij si urbanist e filloi në vitin 1962 në vendlindje, në shërbim të Kuvendit Komunal, të cilin punë e vazhdoi deri në vitin 1969, kohë kur e themeloi “Entin për Urbanizëm dhe Projektim”, e cila ishte në kuadër të Komunës.

Ai gjatë punës në këtë institucion ishte hartuesi i projekteve të shumta, ndër të cilat numërohen edhe moteli “Dardania”, shkolla “Xhemajl Kada”, rekonstruimi i ish-hotel “Metohisë” (tash “Dukagjini”) në Pejë. Më pas e hartoi planin për ndërtimin e Motelit “Trofta” në Istog, Stacionit të Autobusëve në Pejë dhe planet për rekonstruimin e hotel “Theranda” në Prizren.

Prej viti 1979 deri më 1994, ka qenë i angazhuar si ligjërues në Universitetin e Prishtinës, në Fakultetin e Arkitekturës.

Beqiri ka qenë laureat i çmimit “Borba” për motelin “Trofta” në Istog, në vitin 1980. 

© KOHA. Të gjitha të drejtat janë të rezervuara.