235 mijë fermerë në pritje të vaksinave kundër sëmundjes gungore [video]

22 Gusht 2016 - 19:23      

Fermeri Riza Behaj nga Koliqi ka pasur fatin t’i vaksinojë 15 krerë gjedhe kundër sëmundjes gungore të lëkurës. Ai ka arritur t’i marrë ato nga 25 mijë vaksinat e siguruara nga Komisioni Evropian në Kosovë.

Ky fermer, i cili ekzistencën e siguron prej këtyre gjedheve, nuk po mund as t’i shesë ato ngase është krijuar frika pas sëmundjes së lëkurës, raporton KTV.

15 krerë gjedhe të këtij fermeri u vaksinuan, por janë edhe 235 mijë fermerë të tjerë që po presin vaksinat për t’i shpëtuar nga ngordhja gjedhet e tyre.

Sëmundja gungore e lëkurës është duke u përhapur me të madhe, derisa brenda kësaj kohe, numri i atyre të cilat kanë ngordhur nga kjo sëmundje ka arritur në 59.

Agjencia e Ushqimit dhe Veterinarisë të hënën ka dorëzuar kërkesën në Qeverinë e Kosovës, përmes së cilës kërkohet t’u ndahen mjetet e nevojshme për sigurimin e vaksinave nga një vend i largët afrikan.

Qeveria, brenda dy ditësh, pritet të vendosë për këto mjete që mund të arrijnë 1 milion euro.  

© KOHA. Të gjitha të drejtat janë të rezervuara.