Gjuha banale e dy të fuqishmëve të PDK-së [video]

19 Gusht 2016 - 13:09      

Përgjimi i radhës i “dosjes së shefave” shpërfaq gjuhën banale të dy njerëzve të fuqishëm brenda Partisë Demokratike të Kosovë, raporton KTV.

Në dy telefonatat mes kreut të burgosur të Skenderajt, Sami Lushtaku, dhe Adem Grabovcit, sharjet dhe fyerjet janë të pranishme në secilën fjali, teksa shtyhen e koordinohen për emërimin e njerëzve të tyre në pozita të larta shtetërore.

Lushtakut nuk i pëlqen aspak fakti që në krye të Infrakosit është emëruar Agron Thaçi, i cili duket të ketë marrë pëlqimin e Kadri Veselit për këtë pozitë, bazuar në një përgjim të mëhershëm mes Grabovcit dhe Veselit.

Ky fakt bën që Lushtaku të fyejë atë dhe të gjithë bashkëpartiakët e tij, të cilët i quan të pabesë, derisa shpreh habinë sesi një person nga Vitia ka arritur në këtë pozitë. Sidoqoftë Lushtaku e Grabovci, që kishin fuqi të madhe brenda PDK-së, në dy raste kishin dështuar ta emëronin Ramadan Gashin në një pozitë shtetërore. Synonin një pozitë në Agjencinë e Akreditimit dhe atë të drejtorit të Infrakosit. Në dy rastet, pengesë kishin dalë Ramë Buja e Ferat Shala. Fyerje të rënda Lushtaku ka drejtuar edhe ndaj ish-kryeparlamentarit Jakup Krasniqi, i cili atëkohë ishte pengesë për planet e tyre.

Në një moment, Lushtaku i referon Grabovcit që ta heqin Jakup Krasniqin nga ajo pozitë, por ky i fundit i përgjigjet se kjo do të shkaktonte skandal. Përgjimet telefonike dëshmojnë se drejtuesit e PDK-së zgjidhnin njerëzit e tyre në institucione të larta që gjenerojnë miliona euro. Përveç kësaj, ata planifikonin largim të njerëzve nga puna për t’ua lënë pozitat njerëzve të tyre. 

© KOHA. Të gjitha të drejtat janë të rezervuara.