Mustafa ndjek Thaçin: Po kujdesem të sigurohen mbi 80 vota për demarkacionin

18 Gusht 2016 - 23:15      

Pas mesazhit të Hashim Thaçit drejtuar qytetarëve e deputetëve për të votuar demarkacionin, kryeministri Mustafa në Facebook ka shkruar se shpreson se do të ketë unitet për votimin e Marrëveshjes kufitare me Malin e Zi.

Ai ka thënë se lidhur me këtë po vazhdojnë sqarimet në LDK, transmeton Koha.net.

Mustafa ka shkruar:

Të dashur miq, Qeveria që unë drejtoj është e përcaktuar ta çoj përpara agjendën zhvillimore dhe integruese të Kosovës.

Ne kemi program, të cilin po e zbatojmë, pavarësisht problemeve të trashëguara dhe sfidave e pengesave me të cilat po ballafaqohemi. Por, ne jemi këmbëngulës për arritjen e qëllimeve, të cilat jemi të bindur se janë në interes të Kosovës dhe qytetarëve të saj.

Qeveria që unë drejtoj gëzon mbështetjen e një shumice solide në Kuvendin e Kosovës. Por, si kryeministër dhe si njëri prej partnerëve kryesor të koalicionit, për tema të ndjeshme, nuk preferoj asnjëherë të testojë fuqinë e votave.

Unë po kujdesem vazhdimisht dhe sinqerisht për t'u siguruar që Marrëveshja për kufirin me Malin e Zi do të mbështetet nga mbi 80 deputetë.

Në LDK është duke u sqaruar gjithçka rreth kësaj çështjeje dhe jam optimist se do të jemi unik në mbështetjen e ratifikimit të marrëveshjes. Jam optimist se edhe partnerët e koalicionit po bëjnë të njëjtën gjë me deputetët e tyre. 

© KOHA. Të gjitha të drejtat janë të rezervuara.