Pritet ndryshimi i Kodit Penal [video]

18 Gusht 2016 - 19:06      

Ideja e presidentit Thaçi për ndryshimin e Kodit Penal duket të jetë në rrugë të duhur, pavarësisht që kjo nuk është e paraparë në kalendarin legjislativ për këtë vit, raporton KTV.

Ndryshimin e Kodit Penal të Kosovës e ka kërkuar edhe kryeprokurori Aleksandër Lumezi dhe po ashtu kjo ishte edhe njëra ndër detyrat që zëvendëspresidenti amerikan, Biden, ua dha kosovarëve.

Por, pavarësisht kësaj, ndryshimi në Kodin Penal nuk është në kalendarin legjislativ për këtë vit.

Albulena Haxhiu, që e udhëheq Komisionin për Legjislacion, thotë se realisht deri tash nuk ka pasur iniciativa për ndryshime të Kodit Penal apo Procedurës Penale, përveç deklarimeve mediatike.

Megjithatë, ajo shprehet e gatshme që të mbështesë çdo ndryshim që do të ndihmonte luftimin e krimit, por paraprakisht, sipas saj, Kosova ka nevojë të çlirohet nga “kriminelët” institucionalë dhe prokurorët e deleguar nga ta.

Por, zgjatja e hetimeve nuk mund të bëhet pa kufij, ka deklaruar Bekim Blakaj, që drejton Fondin për të Drejtën Humanitare në Kosovë. Kjo praktikë, sipas tij, mund të mos sjellë rezultat. Po ashtu, sipas Blakajt, edhe dënimi në mungesë nëse bëhet si shprehi ka kundër efekt, sa ekonomik aq edhe etik.

© KOHA. Të gjitha të drejtat janë të rezervuara.