Grabovci ua vinte syrin ndërmarrjeve me shumë para në Dukagjin [video]

18 Gusht 2016 - 19:02      

Adem Grabovci ia kishte vënë syrin një ndërmarrjeje në rajonin e Dukagjinit, që kishte tre milionë euro të hyra në vit. Për të kontrolluar paranë, ai do të dërgonte në një pozitë të lartë udhëheqëse njeriun e tij, të quajtur Bujar, raporton KTV.

Bujari do t’i raportonte vazhdimisht Grabovcit për qarkullimin e parasë. Për të ndërmarrë këto veprime, Grabovci ishte këshilluar nga një person i quajtur Ismet, i cili kishte qenë në burg së bashku me Grabovcin gjatë viteve të 80-a.

Pushteti i Grabovcit dhe i Partisë Demokratike mbi ndërmarrjet publike e komunale në rrafshin e Dukagjinit, duke nisur nga Peja, Deçani, Gjakova e Prizreni, dëshmohet në një bisedë të përgjuar telefonike që zgjat mbi dhjetë minuta.

Pos tjerash, Ismeti e informonte Grabovcin që një person, që nuk i përmendet emri, kishte konkurruar për anëtar të Bordit të Ibër Lepencit, ndërmarrje kjo që drejtohej nga miku dhe bashkëpunëtori i Grabovcit, Hajdar Beqa.

Për të arritur këtë pozitë, sipas bashkëbiseduesit, konkurrenti dinte diçka prej veprimeve të Adem Grabovcit. Konkurrenti donte këtë pozitë, ose do të fliste për ato që dinte.

© KOHA. Të gjitha të drejtat janë të rezervuara.