Grabovci e Beqaj punësonin kë donin në tri ndërmarrje publike [video]

17 Gusht 2016 - 19:14      

Në tri ndërmarrje publike PTK, Infrakos dhe Trainkos, punësimet janë bërë nga Adem Grabovci dhe ish-ministri Besim Beqaj, raporton KTV.

Kjo dëshmohet nga bashkëbisedimi mes tyre. Hashim Thaçi u kishte dhënë autorizime të plota Besim Beqajt e Adem Grabovcit që t’i menaxhonin si të donin pozitat në Trainkos, Infrakos dhe Postë Telekomin e Kosovës.

Bazuar në këto autorizime, tashmë ish-shefi i Grupit Parlamentar të PDK-së, Adem Grabovci, dhe ish-ministri i Zhvillimit Ekonomik, Besim Beqaj, kishin anuluar konkurset në këto institucione për borde dhe për kryeshef ekzekutiv.

Dy krerët e lartë të PDK-së kishin qëllim që të sillnin njerëzit e tyre. Agron Thaçin, që vazhdon ta mbajë pozitën e kryeshefit të Infrakosit, e kishin përzgjedhur për këtë pozitë si njeri të besueshëm që do të punonte për interesat e tyre.

Ndërkohë, Sejdi Hoxhën, nipin e Azem Sylës, do ta sistemonin në krye të Postës së Kosovës.

Beqajt i duhej mendimi i ish-kryeministrit Hashim Thaçi, se kë do ta emëronte për ushtrues detyre të PTK-së. Ai, së bashku me Thaçin e Grabovcin, do t’ia diktonin Bordit të PTK-së, që vazhdon të drejtohet nga Rexhë Gjonbalaj, emërimin e Nuredin Krasniqit për ushtrues detyre.

Krasniqi është mik i afërt i Xhavit Halitit.

Beqaj, ndonëse tregohet i kujdesshëm kur flet, megjithatë zbulohet duke bërë plane për vendosje të njerëzve që përfaqësonin interesin e tyre në këto ndërmarrje multimilionëshe.

Besim Beqaj aktualisht është deputet i Partisë Demokratike të Kosovës.

© KOHA. Të gjitha të drejtat janë të rezervuara.