Beau Biden kishte dashuri për Kosovën [video]

17 Gusht 2016 - 19:08      

Beau Biden është emri që do ta mbajë rruga nacionale në fshatin Sojevë të Ferizajt, raporton KTV.

Kjo për nder të djalit të ndjerë të zëvendëspresidentit të Shteteve të Bashkuara të Amerikës, Joe Biden.

Në fjalimin e tij, ai theksoi se këtë vend e pret një punë e madhe, punë e cila, sipas Bidenit, e frymëzoi djalin e tij që të gradohej në ushtrinë amerikane. “Duhet të vazhdoni më tej. Kosova është vend i ri, por jo aq i ri për ta ditur se çfarë meritojnë qytetarët. Jo privilegjet, por vlerat e meritat. Pa përjashtim, askush nuk është mbi ligjin. Për këtë jeni duke punuar”, ka thënë ai.

Ndërkaq, zyrtarët institucionalë e kanë falënderuar SHBA-në për kontributin e dhënë deri më tani në Kosovë.

“SHBA-ja ka shpëtuar Kosovën, ka mbështetur dhe po mbështet rindërtimin e saj.

Falënderimi më i mirë për ndihmën që i keni dhënë Kosovës është zhvillimi ynë.

Populli ynë do t’i kapërcejë pengesat dhe do ta bëjë vend të denjë për të gjitha komunitetet dhe besimet”, ka thënë kryeministri i vendit, Isa Mustafa.

Në ceremoni kanë marrë pjesë edhe familjarë të zëvendëspresidentit amerikan si dhe shumë personalitete e zyrtarë të lartë të shtetit.

© KOHA. Të gjitha të drejtat janë të rezervuara.