Kosova ka nevojë për mbështetje në fushën e sundimit të ligjit

16 Gusht 2016 - 15:07      

Prishtinë, 16 gusht – Ministrja e Drejtësisë, Dhurata Hoxha priti sot shefen e Zyrës së Këshillit të Evropës, znj. Isabelle Servoz - Gallucci, e shoqëruar nga znj. Stephanie Lefeuvre, menaxhere e Projektit për Efikasitetin e Drejtësisë.

Me këtë rast znj. Gallucci përgëzoi ministren Hoxha për marrjen e detyrës së re dhe shfaqi përkrahjen e saj në përmbushjen e synimeve dhe detyrave të Ministrisë, njëherit inkurajoi ministren në realizimin e objektivave dhe qëllimeve si dhe në tejkalimin e sfidave në lëmin e drejtësisë, duke llogaritur në mbështetjen e plotë të Zyrës, transmeton Koha.net.

Në takim, ministrja Hoxha potencoi vullnetin dhe përkushtimin e saj institucional në përmirësimin e gjendjes së përgjithshme në sektorin e drejtësisë, duke theksuar nevojën për forcim dhe përkrahje të fushës së sundimit të rendit dhe ligjit. Po ashtu, ajo vuri në pah rëndësinë e transparencës dhe llogaridhënies, rritjen e efikasitetit, dhe përgjegjshmërisë si faktorë kyç në rritjen dhe përmirësimin e punëve në sektorin e drejtësisë.

Ministrja Hoxha kërkoi që bashkëpunimi i deritanishëm të intensifikohet edhe më tej si në përforcimin e infrastrukturës ligjore, po ashtu edhe në ngritjen e kapaciteteve të Ministrisë. Vlerësim i përbashkët ishte se bashkëpunimi në sferën e infrastrukturës ligjore është tejet i rëndësishëm si në planifikimin e punëve, ashtu edhe tejkalimin e sfidave. 

© KOHA. Të gjitha të drejtat janë të rezervuara.