Policia: Gjatë DokuFestit, çdo gjë si rëndom

15 Gusht 2016 - 14:11      

Pas përfundimit të DokuFestit, Policia e Kosovës ka publikuar një kumtesë me të cilën ka përmbledhur aktivitetet e zhvilluara dhe për masat që ajo ka ndërmarrë gjatë këtij festivali.

Kumtesa, pasi tregon kohën e zhvillimit të festivalit (5 - 13 gusht 2016, Prizren) thotë se gjatë kësaj periudhe, me pjesëmarrjes rekorde të shtëpive filmike nga 57 shtete, shfaqjes së rreth 238 filmave si dhe pjesëmarrjes së rregullt të rreth 15000-25.000 mysafirëve, nuk ka pasur incidente të mëdha.

Polica, thotë kumtesa, është përkujdesur për sigurinë e pjesëmarrësve dhe shton se për punën që ka bërë, policia ka marrë mirënjohje të veçantë.

Incidentet e raportuara gjatë festivalit, shton kumtesa, nuk i tejkalojnë shifrat që raportohen zakonisht gjatë kohës së verës dhe kryesisht janë të natyrës së lehtë me të cilat është marrë policia dhe janë raportuar në prokurorinë e shtetit, transmeton Koha.net.

Sipas të dhënave të policisë në Prizren, gjatë DokuFestit, për posedim të paautorizuar, shpërndarje dhe shitje e substancave narkotike janë iniciuar 19 raste, me urdhër të prokurorit janë ndaluar 5 persona kurse 14 të dyshuar ndiqen sipas procedurës së rregullt.

Duhet cekur se bëhet fjalë për persona të njohur që më parë për policinë, thekson kumtesa.

Të gjitha rastet e raportuara nuk ia zbehin imazhin dhe vlerën e festivalit dhe konsiderohen raste të izoluara që nuk paraqesin rrezikim të sigurisë individuale ose të përgjithshme për pjesëmarrësit, përfundon kumtesa. 

© KOHA. Të gjitha të drejtat janë të rezervuara.