Koalicioni nuk i pati numrat për demarkacion [video]

11 Gusht 2016 - 19:08      

Deri më 1 shtator, koalicioni qeverisës, ka kohë që t’i bindë deputetët që të votojnë pro ratifikimit të marrëveshjes për demarkacionin me Malin e Zi.

Kështu mendon deputeti i LDK-së, Shpejtim Bulliqi, sipas të cilit, pamundësia e sigurimit të votave, ka bërë që të shtyhet seanca e Kuvendit, raporton KTV.

Bulliqi, i cili gjatë tërë kohës është shprehur kundër kësaj marrëveshjeje, ka thënë në Interaktiv se ka pasur kontakte me deputetë të tjerë nga të gjitha partitë, shumë nga të cilët sipas tij, kanë dyshime për versionin e Qeverisë.

Sipas Bulliqit, “demarkacioni aktual ndryshon hartën e Kosovës në flamurin shtetëror”.

Ka reaguar Komisioni Shtetëror për Shënjimin dhe Mirëmbajtjen e Kufirit Shtetëror dhe Lidhja Demokratike e Kosovës. Sipas komisionit, një deklarim i tillë është i pavërtetë, joprofesional dhe me harta, siç i cilëson, të vizatuara sipas qejfit dhe jovalide.

Kurse në reagimin e LDK-së thuhet se kryesia e LDK-së dhe kryetarët e degëve të LDK-së janë shprehur unanimisht në mbështetjen e ratifikimit të vijës kufitare me Malin e Zi.

Deputetin Shpejtim Bulliqi, LDK-ja e ka quajtur zëdhënës të Aleancës për Ardhmërinë e Kosovës.

Ndërkaq, analisti Imer Mushkolaj, beson se koalicioni qeverisës, do të arrijë t’i bindë deputetet që ta votojnë demarkacionin, duke u ofruar poste më të mira, ashtu siç veproi gjatë votimit të Hashim Thaçit për president.

© KOHA. Të gjitha të drejtat janë të rezervuara.