Mustafa i vendosur për ta kryer demarkacion më 1 shtator [Raport i KTV-së]

11 Gusht 2016 - 19:02      

Kryeministri Isa Mustafa është i bindur se më 1 shtator, marrëveshja për Demarkacionin me Malin e Zi do të përfundojë.

Ai thotë se deri atëherë, do ta shfrytëzojë kohën për ta bindur opinionin se me këtë marrëveshje, Kosova nuk humb asnjë pëllëmbë tokë, raporton KTV.

Sipas tij, Komisioni Shtetëror për shënjimin e vijës kufitare ka ofruar të gjitha dëshmitë, pa marrë parasysh çka thonë të tjerët.

E pasi të përfundojë Demarkacioni, Mustafa tha se do të fillojë edhe riformatimi i Qeverisë. Për mënyrat e riformatimit, Mustafa është duke biseduar edhe me partnerët e koalicionit, por bëri të ditur se kjo çështje nuk do të kryhet para 1 shtatorit, pasi është koha e pushimeve.

Këto Deklarata, Kryeministri i bëri gjatë inaugurimit të qendrës së përpunimit të drurit në fshatin Greme të Komunës së Ferizajt.

KTV-ja ka raportuar ditë më parë se përveç shuarjes së ministrisë për komunitete dhe kthim, janë edhe disa ministri të tjera që mund të shkrihen si Ministria e Diasporës, e cila do të kalojë si departament i veçantë në kuadër të Ministrisë së Kulturës, derisa pritet një bashkim i serishëm i ministrisë së ekonomisë, financave dhe Tregtisë në një të vetme.

© KOHA. Të gjitha të drejtat janë të rezervuara.