Malazezët s’lejuan banorët kosovarë të vizitojnë pronat e tyre

11 Gusht 2016 - 06:48      

Banorët e fshatit Llukë e Epërme dhe përfaqësues të fshatrave Strellc i Epërm dhe i Poshtëm, Isniq, Loxhë, Raushiq..., që pretendojnë se kanë prona të veta në bjeshkën në Zhlep të Kullës, kanë bllokuar për mbi dy orë rrugën kryesore mbi pikën doganore në Kullë, shkruan sot Koha Ditore.

Të gjithë ata të mërkurën ishin nisur në organizim të Këshillit të fshatit Llukë e Epërme, që të vizitojnë pronat e tyre dhe varrezat e të parëve të tyre në Bjeshkën në Zhlepit, si dhe të shprehin kundërshtimin e tyre, që ato prona të mos kalojnë në pronësi të Malit të Zi. Në mesin e dhjetëra qytetarëve dukagjinas ka qenë edhe mërgimtari Mentor Thaqi, nga fshati Llukë e Epërme. Ai që disa ditë po qëndron për pushime në atdhe dhe iu ka bashkuar bashkëfshatarëve për të shkuar në Bjeshkët e Zhlepit, ku siç thotë ai, ka edhe familja e tij pronë që po i mbetet në territor të Malit të Zi me vijën e re kufitare të vendosur me Marrëveshjen e demarkacionit mes Kosovës dhe Malit të Zi, shkruan sot më gjerësisht Koha Ditore.

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.