Deçanasit mësyjnë Zhlepin, ndalohen nga polica malazeze [video]

10 Gusht 2016 - 19:16      

Banorët e fshatit Llukë e Epërme dhe fshatrave të tjera të Deçanit, në mënyrë të organizuar, janë nisur të shkojnë në majën e Zhlepit, në kufirin me Malin e Zi, raporton KTV.

Por, ata janë penguar nga forca të policisë malazeze.

Përfaqësuesi i këtyre banorëve, Rasim Mulaj, gjatë tërë kohës, ka tentuar të bindë policët malazezë që të lirojnë rrugën.

Banorët pastaj e kanë bllokuar rrugën për disa minuta. Pas më shumë se një orë qëndrimi afër kufirit, banorët e fshatrave të Deçanit janë nisur për në shtëpitë e tyre.

Mulaj ka shpalosur edhe njëherë faktet që dëshmojnë, sipas tij, se marrëveshja për demarkacion nuk duhet të ratifikohet. Përveç banorëve, këtij aksioni i janë bashkuar edhe deputetë të AAK-së, që janë kryesisht të anës së Dukagjinit.

Aksioni i këtyre banorëve të anës së Deçanit nuk i ka pëlqyer kryetarit të Kuvendit, Kadri Veseli.

Aksionet e tilla, sipas banorëve, nuk do të ndalen, derisa u bëjnë apel deputetëve të Kuvendit të Kosovës që të mos e ratifikojnë marrëveshjen e demarkacionit.

© KOHA. Të gjitha të drejtat janë të rezervuara.