Banorët e fshatrave kufitare me Malin e Zi, paralajmërojnë veprime radikale nëse kalohet marrëveshja

10 Gusht 2016 - 14:43      

Banorët e fshatit Llukë e Epërme dhe përfaqësuesit e fshatrave tjera të vijës kufitare me Malin e Zi, që pretendojnë se i kanë pronat dhe bjeshkët e tyre te Kulla e Zhlepit, sot, përderisa ishin duke shkuar për të vizituar bjeshkën dhe, siç thonë ata, varrezat e të parëve tanë, janë ndaluar “në mënyrë arbitrare nga forcat të shumta policore të Malit të Zi”.

Këtë ndalesë, qytetarët e këtyre fshatrave e quajnë të padrejtë, pasi që thonë se ishte 5 km në thellësi të territorit të Kosovës, ani pse marrëveshja ende nuk është ratifikuar.

“Ne në shenjë proteste bllokuam rrugën kryesore për orë të tëra, shprehëm pakënaqësinë tonë për gabimin e madh të Komisionit Qeveritar, të Presidentit Thaçi, të Kryeministrit Mustafa, dhe në mënyrë kolektive i bëjmë thirrje deputetëve të Parlamentit të Republikës së Kosovës të të gjitha subjekteve politike që të mos e ratifikojnë marrëveshjen dhe ta bashkojnë votën kundër demarkacionit”, thuhet në komunikatën njoftuese të banorëve të fshatit Llukë e Epërme dhe të fshatrave tjera të vijës kufitare me Malin e Zi.

“Në të kundërtën, kjo është tradhti e madhe kombëtare, tradhti ndaj qytetarëve dhe shtetit të Republikës së Kosovës, dhe historia do të ju ndëshkoj rënd, duke u bërë njollë e zezë në historinë e këtij vendi”, potencohet më tej në reagimin e tyre.

Ata thonë se kurrë nuk do të pajtohen me marrëveshjen si të tillë, dhe theksojnë se “nuk do të ketë stabilitet e pajtueshmëri qytetare, dhe nuk do të qëndrojmë indiferentë, e veprimet tona do të radikalizohen”.

Ata këtë reagim e përfundojnë me thirrjen: “Të nderuar deputetë, mos e votoni këtë marrëveshje”. 

© KOHA. Të gjitha të drejtat janë të rezervuara.