Lekaj: Komisioni i “Muratave”, kjo faqe e zezë për Kosovën

8 Gusht 2016 - 21:58      

Pas deklaratës së Komisionit Shtetëror për Demarkacionin se Kosova nuk humb territor në shënjimin e vijës kufitare me Malin e Zi, ka reaguar shefi i deputetëve të AAK-së, Pal Lekaj.

“Komisioni i Muratit i mbështetur edhe nga disa ‘Murata’ të tjerë, nuk janë asgjë më shumë se disa të mjerë që po ulërijnë për t’i dhënë tokën e Kosovës, Malit të zi. Një shprehje popullore thotë ‘bisha para ngordhjes, gjuan me shkelmat e fundit’. Këta ‘Muratat’ e komisionit dhe të qeverisë, duke e parë se gjithnjë e më shumë po demaskohen dhe po del sheshit e vërteta, se janë grebatorë, që duke e keqpërdorur paranë e Kosovës kanë punuar kundër interesave të saj, janë ngritur si hienat me disa kinse argumente, jo kadastri i 1991 jo harta e 2008 jo marrëveshja e Kumanovës e çka jo tjetër, vetëm e vetëm që të shpëtojnë nga ajo çka i pret. Ndjekja penale, sipas ligjeve e kushtetutës së Kosovës. Me akuzën për falsifikim të dokumenteve me synimin për tjetërsim e falje të tokës së Kosovës vendeve tjera”, ka thënë Lekaj.

“‘Muratat’ e qeverisë dhe të komisionit se duan këtë të vërtet, sepse ju duket e pakëndshme, e si zë gjumi natën, prandaj kërkojnë që dikush t’ua thotë atë që kanë dëshirë me ndëgju vetëm këta dhe pastaj asaj t'i vënë emrin e vërtetë”, ka shtuar më tej ai.

© KOHA. Të gjitha të drejtat janë të rezervuara.