Italia e përkushtuar që ta ndihmojë Kosovën në rrugën evropiane

8 Gusht 2016 - 14:24      

Ministrja e Drejtësisë, Dhurata Hoxha priti në takim njoftues Ambasadorin e sapoemëruar të Italisë në Kosovë, Piero Cristoforo Sardi.

Ministrja uroi Ambasadorin për detyrën e re, njëherësh shfaqi përkushtimin për vazhdimin dhe thellimin e bashkëpunimit bilateral mes Kosovës dhe Italisë, jo vetëm në fushën e sundimit të rendit dhe ligjit, por edhe në kuadër të bashkëpunimit rajonal.

Në takim, Ministrja Hoxha falënderoi Ambasadorin Sardi për bashkëpunimin dhe përkrahjen që ka ofruar Ambasada e Italisë në Kosovë, veçanërisht Ministrisë së Drejtësisë dhe u zotua në përmbushjen e prioriteteve dhe objektivave të parapara gjatë mandatit të saj.

Ambasadori Sardi shprehu mirënjohjen e tij për gatishmërinë e Ministres Hoxha për të thelluar bashkëpunimin e deritanishëm, si dhe shfaqi qëndrimet e shtetit Italian për vazhdimin e bashkëpunimit dhe ofroi ndihmë në rrugën e integrimit evropian, duke vlerësuar se “perspektiva evropiane është e garantuar për Republikën e Kosovës dhe se Republika e Italisë është e vendosur për të përkrahur dhe ndihmuar këtë proces, duke ofruar ndihmë në sektorin e drejtësisë”. 

© KOHA. Të gjitha të drejtat janë të rezervuara.