Natyralistët vizitojnë malet e Sharrit dhe Korabit

8 Gusht 2016 - 11:40      

Tiranë,8 gusht – Shumë turistë të apasionuar të natyrës, preferojnë të vizitojnë e të ngjiten në malin e Sharrit e të Korabit.

Nuk janë thjesht aventurier të ngjitjeve malore, por sepse, Malet e Sharrit dhe të Korabit që gjenden në rajonin e Ballkanit Jugperëndimor, janë vendi ku takohet flora ilirike me atë mesdhetare.

Këto male janë ndër zonat më të pasura me biodiversitet bimor në të gjithë Gadishullin e Ballkanit.

Relievi shumë i larmishëm i maleve, i formuar pjesërisht gjatë epokës së akujve, dhe rrjeti i gjerë hidrologjik, kanë krijuar habitate të shumta dhe të shumëllojshme duke sjellë, për rrjedhojë, kushtet e nevojshme për një florë endemike shumë të pasur.

Rajoni karakterizohet nga një numër i madh speciesh të rralla, relike, endemike ose të rrezikuara të florës dhe faunës. Vetëm speciet e bimëve arrijnë në mbi 2000.

Lidhur me faunën, zona përfaqëson një nga qoshet e fundit ku strehohen mishngrënësit e mëdhenj të Europës, si rrëqebulli, ujku dhe ariu i murrmë. Kjo është dhe një nga arsyet përse në këto lartësi ngjiten shumë biolog.