Maxhuni: Kemi parandaluar incidente të karakterit terrorist

8 Gusht 2016 - 10:48      

Drejtori Përgjithshëm i policisë së Kosovës, Shpend Maxhuni, ka nisur raportimin rreth sigurisë në vend, në mbledhjen e Komisionit për Punë të Brendshme, Siguri dhe Mbikëqyrjen e FSK-së.

Maxhuni tha se Policia e Kosovës konsideron se gjendja e sigurisë është e qetë dhe stabile.

“Për tetë muaj PK ka realizuar të gjitha detyrat dhe parashikimet konform planit strategjik”, tha drejtori Maxhuni, raporton KP.

Ai tha se prioritet i tyre është qasja parandaluese.

Në këtë periudhë dhe viteve të fundit është dëshmuar se PK ka ndikuar në uljen e rasteve të krimit. Suksese janë shënuar dhe në luftën kundër trafikimit me qenie njerëzore, ka thënë numri një i Policisë së Kosovës.

“Në vitet e fundit kemi më pak prezencë të drogave të forta. Një prezencë e narkotikëve që është tek ne është marihuanë kanabis, që vjen si pasojë e kultivimit në fqinjësi”, ka thënë Maxhuni.

Policia e Kosovës, sipas tij, ka shënuar suksese edhe në luftën kundër krimit, krimit ekonomik dhe korrupsionit.

“Ne vazhdojmë me masa konkrete shtesë për avancimin e nivelit të sigurisë. Kemi arrit të parandalojmë edhe incidente të karakterit terrorist që i shohim në vende të ndryshme. PK po vazhdon me masa konkrete t’i parandalojë incidentet e tilla”, ka thënë Maxhuni, ndërkohë që raportimi i tij para Komisionit po vazhdon.

Në Komision sot janë të pranishëm edhe anëtarët nga AAK dhe Nisma, Daut Haradinaj dhe Zafir Berisha, të cilët tash e sa kohë kanë munguar në Komisionet e Kuvendit.