Ymeri: Ky regjim do siguri vetëm për kapjen e shtetit, jo edhe për popullin

6 Gusht 2016 - 17:20      

Kryetari i Lëvizjes Vetëvendosje, Visar Ymeri, përmes rrjetit social Facebook, ka kritikuar krerët institucionalë në lidhje me sigurinë në vend.

Ai ka thënë se edhe përkundër ngjarjeve të rënda të kohës së fundit, e sidomos të asaj kur u sulmua me mjet shpërthyes ndërtesa e Kuvendit të Kosovës, Këshilli i Sigurimit të Kosovës nuk është mbledhur.

Sipas tij, krerët e institucioneve të Kosovës nuk e çajnë kokën për sigurinë në vend, por duan vetëm siguri për kapjen e shtetit, raporton Koha.net.

Ky është postimi i plotë i Ymerit:

Se krerët e institucioneve të Kosovës nuk e çajnë kokën për sigurinë në vend na e pat përkujtuar edhe Raporti i Progresit të Komisionit Evropian nga viti i kaluar. Aty thuhej: "Këshilli i Sigurimit i Kosovës, i cili duhet të ketë rol këshillues në të gjitha çështjet e sigurisë, nuk mban mbledhje të rregullta sipas mandatit të tij". Kështu, pavarësisht se a bëhet fjalë për (pa)sigurinë në veri të Ibrit, te kufijtë e Kosovës, apo edhe në ndërtesën e Kuvendit, këtë Këshill të Sigurisë nuk ka se kush ta mbledhë. Mbase, pikërisht ata që duhet dhe munden nuk duan! Afera Pronto 2 me epizodat e saj po na e dëshmon se me çfarë lloji të sigurisë është i preokupuar ky regjim: duan siguri për kapjen e shtetit, jo siguri për popullin dhe territorin e shtetit. 

© KOHA. Të gjitha të drejtat janë të rezervuara.