Ymeri do hetim për komisionin shtetëror e rinegocim për kufirin me Malin e Zi

5 Gusht 2016 - 22:23      

Kreu i Vetëvendosjes, Visar Ymeri, nuk e ka përjashtuar mundësinë që takime si ai i sotmi, kur krerët e partive politike u mblodhën me ambasadorët e “Quintit” në vend, mund të ketë edhe gjatë javës së ardhshme.

Kjo me qëllim që të diskutohet e të gjende zgjidhje për demarkacionin me Malin e Zi.

Por në të njëjtën kohë, Ymeri ka thënë se puna e komisionit shtetëror duhet hetuar.

“Mbase do të ketë takime edhe në javën e ardhshme, të tilla për ta diskutuar çështjen e demarkacionit. Ne mendojmë që kjo çështje duhet hetuar, pra puna e komisionit duhet të zbardhet, lëshimet e gabimet e bëra por edhe shkelja e interesit të Kosovës duhet të zbardhet”, ka thënë Ymeri, përcjell Koha.net.

Ai ka thënë se marrëveshja për demarkacionin me Malin e Zi duhet të rinegociohet me shtetin fqinj, në mënyrë që, siç ka thënë të mos shkelen interesat e asnjërës pale.

© KOHA. Të gjitha të drejtat janë të rezervuara.