Në Klinë, heshtje për akuzat ndaj kryetarit, nënkryetarit e dy të tjerëve [video]

5 Gusht 2016 - 19:31      

Për keqpërdorim të detyrës zyrtare, tani po akuzohet edhe kryetari i Klinës, Sokol Bashota.

Bashkë me të, edhe nënkryetari dhe dy zyrtarë të tjerë të komunës, raporton KTV.

Bashota, që vjen nga radhët e Partisë Demokratike të Kosovës, nuk e ka thënë asnjë fjalë për këtë aktakuzë.

Por nënkryetari i komunës, Enver Berisha, ka deklaruar se deri më tani, nuk kanë ndonjë njoftim zyrtar nga Prokuroria.

Ndërkaq, ngritjen e aktakuzës, e kanë pritur me gëzim, partitë opozitare në Klinë.

Koordinatori i Këshilltarëve Komunalë të Lëvizjes Vetëvendosje, Muhamet Bytyqi, ka kërkuar nga PDK-ja të distancohet nga Bashota dhe ta shkarkojë nga detyra e kryetarit.

Kurse kryetari i degës së AAK-së, Zenun Elezi, ka thënë se është e mirëseardhur ngritja e aktakuzës pas të gjitha atyre akuzave për abuzim me detyrën zyrtare.

Më herët gjatë këtij viti, Policia e Kosovës, me urdhër të Prokurorisë Speciale, e ka bastisur zyrën e kryetarit të Klinës, Sokol Bashota, zyrën e Prokurimit dhe zyra të tjera në këtë komunë.

Dyshimi i Prokurorisë lidhet me raportin e auditimit nga Zyra e Auditorit të Përgjithshëm për pasqyrat financiare të Komunës së Klinës për vitin 2014, i cili ka gjetur disa shkelje sa i përket menaxhimit dhe shpenzimit të parasë publike.

© KOHA. Të gjitha të drejtat janë të rezervuara.