Kuvendi, dy sulme brenda një viti [video]

5 Gusht 2016 - 19:13      

Predha që goditi ndërtesën e kuvendit rreth orës 23 të së enjtes, është sulmi i dytë brenda këtij viti në këtë objekt.

Për herë të parë në muajin mars, nga jashtë ishte hedhur një koktej molotovi në një prej zyrave të Presidencës, raporton KTV.

Sikur edhe sulmi i parë, fatmirësisht edhe sulmi i dytë ka rezultuar vetëm me dëme materiale.

Policia e Kosovës ka gjetur prova që mund të çojnë në identifikimin e kryerësve të sulmit, derisa ende nuk dihen motivet.

Për rastin, kanë reaguar të gjithë liderët dhe subjektet politike, si edhe përfaqësues diplomatikë në vendin tonë.

Presidenti i Kosovës, Hashim Thaçi, e ka dënuar ashpër këtë sulm, ndërsa ka theksuar se ata që e kryen këtë akt, ndonëse ende nuk ua dimë emrat, janë njerëz që nuk e duan Kosovën.

Edhe Qeveria e Kosovës ka reaguar, duke e dënuar sulmin e së enjtes të kryer në objektin e Kuvendit të Kosovës, institucionin më të lartë përfaqësues dhe ligjvënës në vend.

Qeveria e Kosovës konsideron se ky është një sulm qyqar i drejtuar kundër të gjitha institucioneve dhe shtetit të Kosovës.

“Sulmi i mbrëmshëm përbën një sulm kriminal, me elemente të veprimit terrorist, i drejtuar kundër institucioneve dhe popullit të Kosovës”, thuhet në reagimin e Kryetarit të Kuvendit, Kadri Veseli.

Ambasadori amerikan, Greg Delawie, është shprehur i tronditur nga kjo ngjarje.

“Dhuna dhe gjuha që nxit dhunën janë të papranueshme në demokraci,” ka shkruar Delawie në Twitter.

Ndërsa zyra e BE-së në Kosovë, rastin e ka cilësuar si një sulm në demokracinë dhe përfaqësuesit e popullit, me thirrjet për institucionet e rendit që të identifikojnë sa më shpejt autorët dhe t’i sjellin para drejtësisë.

© KOHA. Të gjitha të drejtat janë të rezervuara.