Qeveria: Akte të tilla nuk na ndalin drejt realizimit dhe mbrojtjes së interesave të vendit

5 Gusht 2016 - 09:43      

Qeveria e Kosovës dënon ashpër sulmin e mbrëmshëm kriminal të kryer mbi objektin e Kuvendit të Kosovës, institucionit më të lartë përfaqësues dhe ligjvënës në vend.

Përmes një reagimi dërguar mediave, Qeveria e Kosovës konsideron se ky është një sulm qyqar i drejtuar kundër të gjitha institucioneve dhe shtetit të Kosovës.

“Pa dashur të paragjykoj nëse është në linjën e akteve të dhunshme të paralajmëruara, Qeveria e Kosovës konsideron se akte të tilla nuk do të arrijnë të ndalin përkushtimin dhe punën e institucioneve të Kosovës për realizimin dhe mbrojtjen e interesave të vendit”, thuhet në këtë reagim të Qeverisë së Kosovës.

Sulmet mbi institucione publike, mbi drejtuesit e tyre dhe policinë, si dhe mbi objektet private, sipas Qeverisë së Republikës së Kosovës, janë veprime të ulëta dhe antidemokratike, “të cilat në asnjë rrethanë nuk mund të frikësojnë bartësit e institucioneve të Kosovës për kryerjen e obligimeve të tyre për realizimin e vullnetit të qytetarëve për lëvizje të lirë në BE, për zhvillim ekonomik dhe fuqizim të gjithanshëm të shtetit”.

Qeveria e Kosovës fton organet e rendit që të ndërmarrin të gjitha masat për zbardhjen e kryesve të këtij akti të rëndë kriminal dhe të vënë para drejtësisë kryesit dhe orkestruesit e tij. 

© KOHA. Të gjitha të drejtat janë të rezervuara.