PDK: Akti i mbrëmshëm, sulm ndaj shtetit dhe qytetarëve të Kosovës

5 Gusht 2016 - 09:40      

Partia Demokratike e Kosovës, ka reaguar ndaj sulmit të mbrëmshëm mbi Kuvendin e Kosovës, duke e konsideruar si akt të organizuar kriminal, kundër vlerave të institucionit më të lartë legjislativ të vendit.

PDK nëpërmjet një komunikate ka thënë se sulmi i rëndë kriminal ndaj Kuvendit të Republikës së Kosovës, është sulm ndaj të arriturave tona, ndaj shtetit, rendit demokratik, kushtetues dhe qytetarëve të saj.

“Partia Demokratike e Kosovës, konsideron se ky akt kriminal, është bërë në kohën kur debatet për çështjet e interesit nacional janë e arritur e re e vendit tonë, përfaqësuesve të saj dhe frymës së tolerancës e transparencës në Kuvendin e Republikës së Kosovës. Partitë politike, deputetët dhe opinioni publik kanë përgjegjësi dhe duhet të kontribuojnë në ruajtjen e imazhit dhe promovimit të arriturave të vendit dhe synimit euro-integrues, me vlerat e shoqërisë së lirë dhe demokratike që po ndërtojmë së bashku me partnerët tanë, SHBA-në dhe BE-në”, thuhet në komunikatë.

Partia Demokratike e Kosovës, fton organet e rendit që sa më shpejtë të gjejnë aktorët e këtij krimi të rëndë, të planifikuar, duke i vënë ata para drejtësisë dhe të marrin dënimin e merituar.  

© KOHA. Të gjitha të drejtat janë të rezervuara.