LDK: Sejdiu po merret me tema nacionale për t’i ikur dështimeve në Prishtinë

4 Gusht 2016 - 17:00      

Lidhja Demokratike e Kosovës, me një komunikatë drejtuar medieve, e ka akuzuar rëndë numrin dy të Prishtinës e të Vetëvendosjes, Dardan Sejdiu.

“Nënkryetari histerik i Komunës së Prishtinës, i cili bashkë me shefin e tij mban përgjegjësi për humbje të jetëve të pafajshme dhe plagosjen e 50 njerëzve në Prishtinë për shkak të keqmenaxhimit të kryeqytetit, ishte sot në krye të një proteste anakronike në Prishtinë”, thuhet në komunikatë.

“Dardan Sejdiu, në vend që të përpiqet të imitojë emnakun e tij i cili nxirrte njerëz nga makinat (Molliqaj), e ka për detyrë që të merret me shmangien e rrezikut evident për banorët e lagjes Dodona nga rrëshqitja e asfaltit korruptiv që e kanë shtruar para pak muajve, të merret me rregullimin e kanalizimeve nëpër Prishtinë, të cilën e ka vërshuar uji tre herë vetëm gjatë muajit të kaluar, të heq dorë nga korrupsioni në të cilin ai është i involvuar direkt, të largojë nga komuna njerëzit e inkriminuar një pjesë të të cilëve edhe sot i ka nxjerrë në protestë, e të cilët përbëjnë rrezik për jetën e policëve dhe qytetarëve të tjerë të vendit”, thuhet në komunikatën e LDK-së.

Sipas LDK-së, synimi i Sejdiut dhe shefit të tij në Prishtinë është që të krijojnë sa më shumë kaos lidhur me tema nacionale në mënyrë që njerëzit të mos mendojnë për dështimin e plotë të tyre në qeverisjen lokale.

“Andaj, ftojmë qytetarët e Prishtinës që të mos shqetësohen nga klithmat e histerikut Dardan Sejdiu, i cili edhe për shkak të kaluarës familjare, menaxhimit aktual kriminal në krye të Prishtinës, si dhe pjesëmarrjes direkte në sulmet me molotovë mbi jetën e policëve, nuk ka kredibilitet që të flasë as për tema komunale se lëre më nacionale”, thotë LDK. “Dardan Sejdiu, i cili është viktimë e ambicieve të tij të sëmura dhe keqpërdorimit të pafre të Lëvizjes Vetëvendosje, mban përgjegjësi të drejtpërdrejtë për çdo zhvillim që do të ndodh nëpër protestat e paralajmëruara nga VV dhe për të cilët ai dhe grupi i tij kriminal do të mbajnë përgjegjësi ligjore”, thuhet në fund të komunikatës.

© KOHA. Të gjitha të drejtat janë të rezervuara.