Ratifikohet Marrëveshja me Austrinë për modernizimin e kardiologjisë në QKUK

4 Gusht 2016 - 14:59      

Përmes kësaj marrëveshjeje, Ministria e Shëndetësisë do të sigurojë pajisje për modernizimin e shërbimit të kardiologjisë invazive, përkatësisht modernizimin e shërbimeve të diagnostikimit dhe trajtimit në këtë shërbim.

Kuvendi i Republikës së Kosovës ratifikoi sot Marrëveshjen e kredisë në mes të Qeverisë së Republikës së Kosovës (si haumarrëse) dhe Unicredit Bank Austria AG (si huadhënës) për financimin e projektit “Modernizimi i shërbimeve të kardiologjisë invazive në Qendrën Klinike Universitare të Kosovës”, thuhet në njoftimin e Ministrisë së Shëndetësisë.

Vlera totale e projektit që do të financohet përmes kësaj marrëveshjeje është 2.6 milionë euro dhe do të realizohet përmes Ministrisë së Shëndetësisë, ndërsa përmes kësaj huamarrje do të sigurohen pajisje për modernizimin e shërbimit të kardiologjisë invazive, përkatësisht modernizimin e shërbimeve të diagnostikimit dhe trajtimit në këtë shërbim.

Marrëveshja e ratifikuar sot nga Kuvendi i Kosovës është pjesë e kredisë prej 20 milionë eurove midis Qeverisë së Republikës së Kosovës dhe Qeverisë së Austrisë, e ratifikuar në Kuvendin e Kosovës në vitin 2012.

Marrëveshje është arritur duke u bazuar në kriteret e Organizatës për Bashkëpunim Ekonomik dhe Zhvillim, me seli në Paris, për kreditë eksportuese.

Me ratifikimin e kësaj marrëveshjeje nga Kuvendi i Kosovës, Ministrisë së Shëndetësisë i hapet mundësia për sigurimin e pajisjeve të reja për shërbimin e kardiologjisë invazive në Qendrën Klinike Universitare të Kosovës, të cilat pritet të rezultojnë me rritje të vëllimit dhe cilësisë së shërbimeve shëndetësore në këtë shërbim.