Qeveria thotë debati u fitua nga Komisioni Shtetëror për Demarkacion

3 Gusht 2016 - 22:44      

Qeveria e Republikës së Kosovës nëpërmes një komunikate ka thënë se ka dominuar argumenti i Komisionit shtetëror për Demarkacion.

Ata kanë thënë se e vlerësojnë lartë debatin e zhvilluar sot lidhur me procesin e shënjimit të kufirit ndërmjet Republikës së Kosovës dhe Republikës së Malit të Zi,. Duke shprehur mirënjohje për të gjithë pjesëmarrësit dhe organizatorët e debatit për kontributin e tyre në këtë debat shumë të dobishëm për proceset e rëndësishme nëpër të cilat po kalon vendi, transmeton Koha.net.

Qeveria thotë se ka dominuar argumenti se procesi i shënjimit të kufirit ka qenë në rregull.

“Qeveria e Kosovës, pas dëgjimit të çdo argumenti dhe fjale në këtë debat, vlerëson se në të ka dominuar argumentimi i cili konfirmon se procesi i shënjimit të kufirit të Kosovës me Malin e Zi është bërë në përputhje me aktet kushtetuese e ligjore të Kosovës, si dhe në përputhje me standardet dhe praktikat më të mira që kanë të bëjnë me kriteret dhe aspektet tjera të realizimit të këtij procesi”, thuhet nga Qeveria e Kosovës.

Qeveria e Republikës së Kosovës, më tej ka thënë se shpreh mirënjohje të posaçme për qëndrimet shumë të vlefshme të ambasadorit të Shteteve të Bashkuara të Amerikës dhe përfaqësuesit të BE-së.

“Në përputhje me qëndrimet racionale dominuese në këtë debat, Qeveria e Kosovës, do të vazhdojë angazhimet e saj në procedimin e kësaj çështje më tutje”, përfundon Qeveria.

© KOHA. Të gjitha të drejtat janë të rezervuara.