“Zemërgjerësia” e Adem Grabovcit [video]

3 Gusht 2016 - 19:24      

Shefi, siç e thërrasin të gjithë Adem Grabovcin, është shumë zemërgjerë. Ai bashkëpartiakët e tij i përzgjedh për t’i emëruar në pozitat më të larta në institucionet publike.

Autoriteti i tij shkon aq larg, sa tenton t’i emërojë njerëzit në borde edhe pa konkurruar fare në konkurset publike.

Në pjesën e dytë të përgjimeve të publikuara nga portali Insajder, Grabovci, përmes telefonit, ia kumton lajmin bashkëpartiakut të tij, Bahri Hysenit, se ia ka gjetur vendin e punës në bordin e Operatorit të Sistemit, Transmisionit dhe Tregut.

KTV-ja ka tentuar të kontaktojë me Bahri Hysenin, i cili tashmë është prokuror në Prokurorinë Themelore në Ferizaj, por kontakti me të ka qenë i pamundur.

Hyseni, në të kaluarën, kishte qenë deputet i Partisë Demokratike të Kosovës, derisa u votua, por jo mjaftueshëm, për anëtar të Gjykatës Kushtetuese të Kosovës.

Operatori i Sistemit, Transmisionit dhe Tregut të Energjisë Elektrike të Kosovës është kompani publike me 100 % aksione shtetërore, por e cila funksionon në mënyrë të pavarur nga çdo ndërmarrje e angazhuar në aktivitete mbi energjinë elektrike.

Përndryshe, vlen të theksohet se Kosova disa herë ka marrë vërejtje nga Bashkësia Ndërkombëtare lidhur me emërimet politike nëpër ndërmarrjet publike.

© KOHA. Të gjitha të drejtat janë të rezervuara.