Babë e bir, të dënuarit për rastin Medicus, në arrati [video]

2 Gusht 2016 - 19:09      

Lutfi e Arban Dervishi, të dënuar në rastin Medicus, përfundimisht janë arratisur nga Kosova.

Megjithëse Arban Dervishi kishte bërë kërkesë që të shtyhet vuajtja e dënimit, duke thënë se nuk po ikë nga drejtësia, as ai e as babai i tij nuk janë kthyer më kurrë në Kosovë. Gjykata Themelore e Prishtinës nuk është përgjigjur në pyetjet e KTV-së nëse ka lëshuar urdhër-arrest ndërkombëtar për ta.

Të dënuarit në rastin ‘Medicus’ përfundimisht i kanë ikur drejtësisë në Kosovë.

Babë e bir, Lutfi e Arban Dervishi, janë arratisur nga Kosova, me t'u bërë aktgjykimi i formës së prerë.

Ata janë të dënuar me nga 8 vjet burgim për krim të organizuar dhe trafikim me qenie njerëzore.

Gjykata Themelore e Prishtinës ka konfirmuar për KTV-në se të dënuarit nuk janë në burg, por nuk ka kthyer përgjigje nëse tashmë ka lëshuar urdhër-arrest ndërkombëtar për ta.

Ju njoftojmë se procedura për ekzekutimin e sanksionit penal-dënimit me burg për të dënuarit në rastin “Medicus” është në vazhdim. Gjykata ka ndërmarrë të gjitha veprimet e duhura dhe të lejuara sipas ligjit.

Petrit Dushi, avokat i Arban Dervishit, ka thënë për televizionin se që prej largimit të tyre nga Kosova, ai nuk ka arritur të ketë kontakt me klientin e tij.

Ky nuk është rasti i vetëm kur të dënuar nga Gjykata janë arratisur, duke mos vuajtur dënimin, përfshirë politikanë.

Por, sikur Gjykata Themelore, ashtu edhe ajo e Apelit, kur ua ka konfirmuar dënimin, kanë dështuar të aplikojnë dispozitat e Kodit të Procedurës Penale, sipas të cilave, të dënuarit duhet të ishin në paraburgim.

Kodi i Procedurës Penale, në nenin 367 pika 2, parasheh masën e paraburgimit, nëse një e tillë nuk është në fuqi, për dënimet mbi 5 vjeçare.

‘Medicus’ ka qenë një ndër rastet me bujë të madhe, jo vetëm në Kosovë, por edhe në botë.

© KOHA. Të gjitha të drejtat janë të rezervuara.