Ngrihet aktakuzë me dyshimin se deshi t’i bashkohet ISIS-it

2 Gusht 2016 - 16:48      

Prokuroria Speciale e Republikës së Kosovës, ka ngritur sot aktakuzë, pranë Gjykatës Themelore në Prishtinë, kundër të pandehurit V.C., për vepër penale: Bashkimi apo pjesëmarrja në ushtrinë ose policinë e huaj, në formacionet e jashtme paraushtarake ose parapolicore, në organizimet grupore apo individualisht jashtë territorit të Republikës së Kosovës, në tentativë, nga neni 3, paragrafi 3 i Ligjit Nr. 05/L -002 për ndalimin e bashkimit në konflikte, njofton kumtesa nga prokuroriale, transmeton Koha.net.

Sipas aktakuzës i pandehuri V.C, më 29.12.2015 së bashku me të fejuarën e tij, L.M., kishin tentuar që t’ i bashkëngjiten organizatës terroriste ISIS në Siri, në atë mënyrë që me datë 29.12.2015 rreth orës 18:30 kishin udhëtuar për në Stamboll-Turqi përmes Aeroportit Ndërkombëtar të Prishtinës “Adem Jashari” dhe pas arritjes në Aeroportin “Ataturk” në Stamboll dhe kontrollit nga ana e autoriteteve turke, të njëjtëve i është refuzuar hyrja në Turqi dhe të nesërmen me datë 30.12.2015 janë deportuar menjëherë nga Turqia për në Kosovë.

Me këtë ka kryer veprën penale: Bashkimi apo pjesëmarrja në ushtrinë ose policinë e huaj, në formacionet e jashtme paraushtarake ose parapolicore, në organizimet grupore apo individualisht jashtë territorit të Republikës së Kosovës, në tentativë nga neni 3, par.3, të Ligjit Nr. 05/L -002 për ndalimin e bashkimit në konflikte të armatosura jashtë territorit të vendit, lidhur me nenin 28 të Kodit Penal të Republikës së Kosovës.

Aktakuza është ngritur nga një prokuror vendës i Prokurorisë Speciale të Republikës së Kosovës, i cili i ka propozuar Gjykatës që pas administrimit të provave dhe përfundimit të shqyrtimit gjyqësor të pandehurin, për veprën penale që akuzohet, ta shpallë fajtor dhe ta gjykojë sipas ligjit.

© KOHA. Të gjitha të drejtat janë të rezervuara.