MSH ka nisur vërtetimin e dokumenteve shëndetësore për qytetarët që udhëtojnë jashtë vendit

1 Gusht 2016 - 15:06      

Prishtinë, 1 gusht - Në përputhje me obligimet që ka Republika e Kosovës ndaj Konventës Apostille, pjesë e së cilës konventë tanimë është edhe Kosova, që nga data 15 qershor 2016, Ministria e Shëndetësisë ka filluar vërtetimin e dokumenteve shëndetësore për nevoja të qytetarëve, të cilët udhëtojnë jashtë shtetit, bën të ditur përmes një njoftimi Divizioni i komunikimit me publikun i kësaj ministrie.

Për vërtetimin e dokumenteve shëndetësore, Ministria e Shëndetësisë ka hartuar Procedurë Standarde të Operimit (shih: SOP).

Për të realizuar këtë të drejtë, palët duhet të drejtohen në recepcionin e MSh, ku plotësohet një formë e kërkesës për vërtetim të dokumentit shëndetësor. E tërë procedura e vërtetimit mund të zgjasë maksimalisht dy ditë me kusht që dokumenti t’i përmbush kriteret ligjore.

Pas aplikimit, Ministria e Shëndetësisë verifikon të gjitha të dhënat lidhur me institucionin (publik ose privat), verifikim që ka të bëjë me licencimin e institucionit, licencimin e profesionistit shëndetësor nënshkrues i dokumentit shëndetësor, etj.

Dokumenti i cili nuk është ne përputhje me Udhëzimin Administrativ Nr. 04-2013 (Certifikatat Shëndetësore), Udhëzimin Administrativ Nr 02-2010 (Dokumentet Unike Shëndetësore) nuk do të vërtetohet nga ana e MSh-së. Kjo rregull përjashtohet vetëm për dokumente të cilat nuk janë pjese e këtyre Udhëzimeve Administrative.

Kërkojmë nga Institucionet Publike dhe Private Shëndetësore që dokumentet shëndetësore të cilat i lëshojnë për palët, të jenë në përputhje me Udhëzimet Administrative Nr 04-2013, Nr. 02-2010 dhe Nr. 10-2010.

Këto udhëzime administrative, institucionet mund t’i gjejnë në web faqen e Ministrisë së Shëndetësisë www.msh-ks.org, rubrika Legjislacioni-Udhëzimet Administrative.

© KOHA. Të gjitha të drejtat janë të rezervuara.