Kadrijaj: Mustafa ka filluar shantazhet për mbrojtjen e demarkacionit

31 Korrik 2016 - 18:17      

Deputetja e AAK-së Time Kadrijaj nëpërmes një reagimi ka thënë se kryeministri Isa Mustafa po shantazhin vartësit e tij që të mbrojnë versionin e demarkacionit sipas Komisionit Shtetëror për Demarkacion me Malin e Zi.

Ajo thotë se kryeministri e ka humbur logjikën dhe se ka filluar shantazhet dhe kushtëzimet me punë, e këtë Kadrijaj e krahason me regjimin e Millosheviqit, transmeton Koha.net.

“Duke u afruar data 3 gusht, qeveria dhe kryeministri e kanë humbur logjikën. Kam menduar se pas rrëzimit të regjimit të Millosheviqit, shantazhet dhe kushtëzimet për vende të punës kanë përfunduar. Por çuditërisht këto dukuri po vazhdojnë edhe sot. Isa Mustafa, të gjitha institucioneve përgjegjëse për demarkacion, eksperteve dhe të punësuarve, ju ka thënë: ‘o mbrojeni demarkacionin sipas versionit të komisionit qeveritar o shkoni në shtëpi’”, shkruan Kadrijaj, e cila lut të gjithë që mos të binë pre e politikës ditore.

“E si deputete e Kuvendit të Kosovës kam një lutje për të gjithë keta persona, mos bini pre e politikës ditore se kufiri është një!! Kullë, Zhlep dhe Çakorr”, përfundon Kadrijaj.

© KOHA. Të gjitha të drejtat janë të rezervuara.