Shumica që kërkuan ndihmë në Emergjencën e Prishtinës ishin të rinj [video]

30 Korrik 2016 - 19:03      

Atmosfera në sheshin “Zahir Pajaziti” është krejt ndryshe nga ajo e një dite më parë, e cila u karakterizua me gjuajtje armësh, panik të madh, e me lëndime në njerëz, raporton KTV.

Qindra vetë që po e festonin nisjen e Festivalit të Birrës, u tronditën rëndë kur të premten mbrëma dëgjuan të shtëna armësh në mes të turmës. Dëshmitarët e rastit, të cilët po festonin në Beer Fest, thonë se menjëherë është përhapur panik i madh, duke thënë se janë sulmuar edhe nga ISIS-i. Nga frika e madhe që është krijuar, dhjetëra njerëz u lënduan, duke tentuar të iknin nga vendi i ngjarjes.

Sipas specialistëve të Emergjencës, shumica e pacientëve që kanë kërkuar ndihmë mjekësore, kanë qenë kryesisht të moshave minore.

Ndonëse lëndimet e tyre nuk janë me armë zjarri, Policia e Kosovës ka pohuar se dyshohet për të shtëna armësh, dhe se në vendin e ngjarjes janë gjetur edhe disa gëzhoja të plumbave.
Zëdhënësi, Agron Borovci, përmes një përgjigjeje me shkrim, ka konfirmuar se policia ende nuk e ka identifikuar personin që ka shkrepur e as nuk i ka zbuluar motivet e këtij incidenti. Ndërkohë, është thënë se janë intervistuar disa persona lidhur me rastin.

© KOHA. Të gjitha të drejtat janë të rezervuara.