“LegalLeaks”, trajnimi i KMShK për qasjen e gazetarëve në informata

3 Qershor 2014 - 14:23      

Qasja në informata, e drejta në qasje dhe pse është ajo e rëndësishme për gazetarët, ishin tema kyçe të trajnimit dyditor të titulluar Legal Leaks, të cilin organizoi Këshilli i Mediave të Shkruara të Kosovës së bashku me UNESCO-n dhe organizatën Access info Europe.

Ky trajnim në Prishtinë tuboi shumë gazetarë dhe studentë të gazetarisë, të cilët dëgjuan paraqitjet nga Adeline Hulin, Sektori i Komunikimeve dhe i Informacionit në UNESCO, Helen Darbishire, drejtoreshë e Access info Europe, Victoria Anderica, hulumtuese dhe zhvilluese e fushatës pranë Access info Europe.

Nga përfaqësuesit e Këshillit të Mediave të Kosovës ligjeroi prof. dr. Ibrahim Berisha, kryetar i bordit të KMSHK-së. Ai informoi të pranishmit mbi funksionimin, mekanizmat dhe sfidat e Këshillave të Mediave, ndërsa Flutura Kusari, anëtare e bordit të KMSHK-së, paraqiti temën: “Kërkimi i informatave në Kosovë: të kuptuarit e legjislacionit” duke informuar kështu të pranishmit mbi të drejtat e qytetarëve dhe gazetarëve në veçanti, për të kërkuar të dhëna nga institucionet e ndryshme në Kosovë.

Gresa Musliu, koordinatore për lirinë e qasjes në informata pranë BIRN-it, prezantoi pesë raste që ajo ka inicuar për të marrë informata nga institucionet publike, dhe sfidat nëpër të cilat ajo ka kaluar për të marrë ato informata.

Gjatë këtij trajnimi, u prezantua edhe Udhëzuesi për gazetarë për qasje në dokumente publike, botim i Access info Europe, UNESCo-s, dhe Këshillit të Mediave të Shkruara të Kosovës.