Betejë e komplikuar për të mos i paguar Austrisë 5 milionë euro

29 Korrik 2016 - 15:17      

Sekretari i përgjithshëm i Ministrisë së Brendshme të Kosovës, Driton Gashi, gjatë një prononcimi rreth detyrimit që t’i paguaj shtypshkronjës shtetërore austriake “AG Staatsdruckerei” 5 milionë euro, për skandalin me pasaportat, tha se ‘dje nuk ishim të gatshëm të reagonim për këtë vendim’, transmeton koha.net.

Ai në vazhdim shtoi se “kemi pranuar vendimin dhe kemi filluar ta analizojmë. Vendimi i arbitrazhit është çështje serioze. Betejë e komplikuar ligjore, që ndikon në kredibilitetin e MPB-së”.

Në shkurt të vitit 2013, shtypshkronja shtetërore e Austrisë kishte ngritur padi në gjykatën e Odës Ndërkombëtare Ekonomike në Paris kundër Republikës së Kosovës. Arsye e ngritjes së padisë, ishin pagesat e pakryera rreth prodhimit të pasaportave biometrike, sikurse kërkesa për kompensim për shkak ndërprerjes së parakohshme të kontratës nga ana e Republikës së Kosovës, thuhet në këtë vendim. Kontrata ishte ndërprerë, pasi që edhe MPB-ja edhe pala austriake ishin mashtruar nga Natali Veliaj, pronare e kompanisë “Consulting EU”.

Sipas vendimit të asaj gjykate shteti i Kosovës duhet t’i paguajë shtypshkronjës shtetërore austriake “AG Staatsdruckerei” rreth 5 milionë euro.

Gazmend Nushi, avokat, përkundër vlerësimeve se Kosova nuk mund t’i shmanget këtij detyrimi, thotë se ky vendim nuk është i apelueshëm.
“MPB do të nisë procedurën për anulimin e vendimit”
Kosova ka 14 ditë afat që t’ia paguajë pesë milionë euro austriakëve.

Rasti i shtypshkronjës austriake lidhet edhe me procesin gjyqësor të dy personave të shumë përfolur kohëve të fundit për krim të organizuar, siç ishte përfaqësuesja e kësaj kompanie në Kosovë, Natali Veliaj.

© KOHA. Të gjitha të drejtat janë të rezervuara.