Evropianët nën pushtetin e një krize besimi, populizmi në rritje

6 Shkurt 2017 - 14:04      

Bruksel, 6 shkurt – Shumica e evropianëve gjykojnë se vendi i tyre po shënon rënie në shumë drejtime, shoqëruar me rritje të mosbesimit ndaj partive politike dhe institucioneve ndërkombëtare, dhe zgjerim të populizmit, sipas një studimi të kryer në pesë shtetet më të mëdha evropiane.

Në Itali, 73 për qind e të intervistuarve besojnë se vendi i tyre është në regres, 69 për qin në Spanjë, 67 për qind në Francë, 57 për qind në Britaninë e Madhe dhe 47 për qind në Gjermani, sipas një studimi të kryer në tetor, nëntor 2016 nga Ipsos Global advisor, publikuar sot.

Shumica e francezëve (61 për qind), e italianëve (60 për qind) dhe e spanjollëve (56 për qind) janë të bindur se gjanerata e tyre ka një jetesë më të keqe se ajo e prindërve të tyre, një vizion i njëjtë dhënë nga 44 për qind e gjermanëve dhe 43 për qind e britanikëve.

Si rezultat, evropianët kanë pak ose aspak besim tek qeveria e tyre, si 89 për qind e spanjollëve, 80 për qind e italianëve, 77 për qind e francezëve, 70 për qind e gjermanëve dhe 66 për qind e britanikëve.