Rrënimin e murit LDK e quan hap drejt konsolidimit e forcim të sovranitetit

5 Shkurt 2017 - 19:54      

Lidhja Demokratike e Kosovës përshëndet zhvillimin e sotshëm, siç e quan, pozitiv të rrëzimit të murit.

“Ky veprim paraqet hapin e radhës, në drejtim të konsolidimit të sundimit të rendit dhe ligjit, si dhe forcimin e sovranitetit institucional në Republikën e Kosovës”, thuhet në reagimin e LDK-së.

Për Lidhjen Demokratike të Kosovës, zhvillimi i sotëm është vazhdimësi e angazhimit të Qeverisë së Republikës së Kosovës, si dhe institucioneve tjera qendrore, që reflektojnë lidership të guximshëm, të matur dhe shtetformues politik.

“Lidhja Demokratike e Kosovës çmon lart rolin esencial të Ambasadës së Shteteve të Bashkuara dhe Zyrës së Bashkimit Evropian, që në koordinim me institucionet vendore, qendrore e lokale, u angazhuan që ky zhvillim t'i kontribuojë klimës së mirëbesimit në vend”, thotë LDK. “Lidhja Demokratike e Kosovës inkurajon përfaqësuesit e të gjithë spektrit politik, që t'i kontribuojnë dialogut dhe konsensusit, në kuadër të orientimit pro perëndimor të Republikës së Kosovës, të konfirmuar në vazhdimësi nga krerët e institucioneve dhe nga kryeministri, akademik Isa Mustafa”, thuhet më tej në këtë komunikatë.

© KOHA. Të gjitha të drejtat janë të rezervuara.